Rehber Mehmúdzade

Ew taybetmendíyaney debine hoy ewey ferhengék be ferhengékí cak binasín u le hellsengandin da jégayekí berzí pé bideyn, kamanen? Lewaneye kodengíyekí réjheyí le ser em taybetmendíyaney xuwarewe le néw xuwéneranda hebét:

1. Gishtgirbúní (jamé’ búden) ferhengeke. Wate katék be níyazí dozínewey medxelék lékí dekeyewe destit be rúyewe nené u medxelekey girtibét.

   Rehber Mehmúdzade

   Ew taybetmendíyaney debine hoy ewey ferhengék be ferhengékí cak binasín u le hellsengandin da jégayekí berzí pé bideyn, kamanen? Lewaneye kodengíyekí réjheyí le ser em taybetmendíyaney xuwarewe le néw xuwéneranda hebét:

   1. Gishtgirbúní (jamé’ búden) ferhengeke. Wate katék be níyazí dozínewey medxelék lékí dekeyewe destit be rúyewe nené u medxelekey girtibét.
      
   2. Lékdanewe u manakirdnewey rast. Gishtgirbún katék bayexí heye eger ew shíkirdnewesh ke le beranber medxelekan da hatún berrastí erkí cawsaxíy xoyan berréwe biben u xuwéner be larréda neben u zanyaríy helle u hellxelleténerí lé neden.
   3. Zanistíbún. Ew dú taybetmendíyey beré amajheman pé kird herremey xellk razí deka, bellam em taybetmendíyey duwaweye ke le lékdanewey wurdtir u hellsengandiní pisporranetir da wérray ew taybetmendíyaney péshú serinjí pé dedirét.
      1-3 díyarí kirdiní jorí wushe yan zarawe yan rékewendék ke wek medxel dandirawe. Bo nimune le ferhengí wusheda métodí zanstí wa dexuwazé, jorí wushekan le barí rézimaníyewe díyarí bikrén.
      2-3 lék hellawardiní kertekaní wushe, eger wusheke lékdiraw bé.
      3-3 níshandaní recellekí zimaníy wushe.
      4-3 hénanewey shayed u nimúne bo wushe.

   Ésta eger be guwérey em péweraney begishtí ta ésta basman kirdin, henbane boríney hejhar legell qamúsí Zebíhí hellsengénín le waneye be xuwéndineweyekí xishkeyí, bem enjame bigeyn ke henbane boríne le qamús gishtgirtire (díyare hellsengandinekeman her wushekaní dú herifí «elf» u «bé» degirétewe, cunke qamús her heta ew dú herfe hatúwete lésh) bellam qamús le Henbane boríne zanstítire. Le henbane boríneda zor wushe dedozínewe ke le qamúsda nín, wekú: ashmay, asho (be manay wucan), ashot, ashujhin1 u …, bellam eger ew cuwar wurde taybetimendíyaney basim kirdin bikeyn be péwerí zanistíbún, le taybetimendíy cuwaremda nebé (hénanewey shayed u nimúne bo wushe) ke henbane boríne le qamús naménétewe, bo recawkirdiní sé merjekey tir ewe qamúse ke goy giréwí birdotewe. Ba birrwaníne em nimúnaney xwarewe:

   Le Henbane boríneda le beranber wushey ajhodan, her hénde núsirawe: bo shewlewerr birdiní mégel2. Le qamúsda sereta kertekaní wushe lék juda kirawinetewe: ajho+dan, duwaye jorí wusheke le barí rézimaníyewe díyarí kirawe: (مصتـ.ـ. [yaní mesderí tékellaw] mitـ.[yaní mute’edí] ínja manay wusheke lékdirawetewe: birdine derewey ajhall be shew bo lewerrandin … Duwatir ew wusheye le rsteyekda wekú nimúne kellkí lé wergírawe: eme cend rojhéke raneke ajho dedeyn. Duway hemúyan be níshaney estére, hawta (muteradif)í wusheke hatúwe : shewbekéw3.

   Le qamúsda recellekí wushekanísh díyarí kirawin. Bo nimúne le pésh wushey asar núsirawe [‘a : آثar]. Níshaney «’E» kurtkirawey ‘Erebíye. Le pésh wushey asan núsirawe [phـ : asan]. «phـ» kurtkirawey pehlewíye4.

   Eger em sé xalle bikeyn be péwerí hellsengandiní ferhengí zarekíy mukiríyan, em ferhenge lem taqíkaríyeda con derdecé? ber le weí wellamí em pirsíyare bideynewe ba súkelengerék bigrín u le ser ew neríte ferhengnúsíyey ـــem ferhenge péyíewe bestirawetewe nexték bidiwéyn.

   Xuwa lé xosh bú duktor Ewrrehmaní Hají Marif le wutarékí bepézída be nawí «ferhengnúsí» be shéweyekí térutesel awirrí le méjhúy ferhengnúsíy Kurdí dawetewe5. Lem wutareda ferhengekan le hendék barewe polén kirawin. Bo nimúne basí jíyawazíy ferhengí ínskilopídí u ferhengí fílolojhí kirawe (duwatir lem bareyeda dediwéyn): yan basí jíyawazíy ew ferhengane kirawe ke be kerestey zimaní zigmak, manay wushey zimanékí bégane lék dedenewe legell ewaney bepécewane be kerestey zimanékí bégane, manay zimaní zigmak lék dedenewe. Herweha lem wutareda ferhenge Kurdíyekan be guwérey shuwén u katí núsiraníshíyan polín kirawin, bellam heta kotayí wutareke, kem u zor basí jíyawazíy níwan ferhengí zarekí u ferhengí nivísarí nekirawe.

   Herweha mamosta Hejharísh le péshekíy henbaneboríney xoyda basí jíyawazíy néwan ew ferhenganey kirdúwe ke wushe Kurdíyekaníyan be ‘Erebí yan be Farsí lék dawetewe legell ewaney ferhengí Kurdí be Kurdín. Bellam ewísh basí jíyawazíy néwan ferhengí nivísarí u ferhengí zarekí nekirdúwe.

   Le Kurdistaní Íranda le sallí 1367í kocí hetawí be duwawe, hendék ferheng núsirawin ke nakiré be hasaní nawí ferhengí wusheyan le ser dabinéyín. Herweha nawdérkirdiníyan be ferhengí nivísarísh jégey dirrdongí u térramane. Em ferhengane birítín le:

   1. ferhengí wushe dúwanekaní zimaní Kurdí, núsirawí Xuwa lé xosh bú Teha Feyzízade. Le pashkoy em kitébeda dú namílkey «nobere»u «hewén» peywest kirawin ke le yekemíyanda tewawí ew rékewend u zarawe u pend u mesel u beyt u bawaney hellgirí cawgí«cún»n ko kirawinetewe u le dúwemíshíyanda ewaney wushey «dest»íyan le xo girtúwe, réckeyan pé bestirawe6.
   2. pendí péshíníyan, núsirawí Seyd ‘Ebidulhemíd Híret Sejjadí⁷.
   3. Emsal u hukem kirdí, núsirawí Qadir Fetahí Qazí dú berg⁸.
   4. destebuxce zarawey jhinaní Mukiríyan, kokirawey Hédí (Je’fer Husénpúr)⁹.

   Díyare em ferhengane le ceshiní henbaneboríne u qamús nín.

   Bo jíyawazí danan le néwan ferhengí le ceshiní henbaneboríne u le ceshiní ferhengí zarekíy mukiríyan, hewell bírokeyek ke méshikman xtúke deda le waneye em bírokeye bé ke billéyín henbaneboríne ferhengékí tewtoye, em wushaney le xo girtúwe ke le núsíní Kurdída be kar dehéndirén, bellam ferhengí zarekíy mukiríyan hellgirí ew peyvaneye ke be ser zarí xellkewen u le shéwe axaftinekaní xomanetirda kelkíyan lé werdegíré. Em bíroke seretayíe cend giriftékí heye. Yek lewane eweye ferhenge be zarekí nawdérkirawekan detwanin le xogirí zarawe u rékewendí ewto bin ke bo bekarhénaníyan le néw zimaní nivísarída lemperék le gorréda nebé, bigre be karísh hatibin, ké dellé nakiré zarawey aw le awerro derkirdin le zimaní núsínda kelkí lé werbigíré? Bepécewane ferhenge be nivísarí nawdér kirawekan wa heye wushey ewtoyan girtibé ke taybet be axaftiní xellkí remekín u le zimaní núsínda layan lé nakirétewe. Bo nimúne henbaneboríne wushey «juhme»í ke shéwey be helle gorrdirawí wushey «jum’e»íye, girtúwe. Tenanet mamosta Hejhar le beranberída núsíwíetí «ju’eme»10. 

   Giriftí dúhem le rastída giriftí zimaní núsíní Kurdíye ke héshta le rewtí standard búnda neytwaníwe zor qonaxan berew pésh bibirré. Éstash le núsíní Kurdída ke qerare standard bé híc sillemíneweyek le ast be kar hénaní tenanet be léshawí peyví súkellekiraw u seruguwé perríw u le résaladaw ke taybete be zimaní remekí u rojhane le gorréda níye. Lewaneye xuwéner ceshinék be súkdananí zimaní axaftin u berztir nirxandiní zimaní núsín lem gutey serewe bixuwénétewe. Bo ewey pésh bem xirap tégeyshtine bigrín bo labasékí díke ke péwendíyekí qaym u qúllíshí legell basí ferhengí zarekí heye qellembazék dedeyn, héndék le xawenrrayan leser em birrwayen ke zimaní zarekí xoy dú leqí serekí lé debétewe. Yekíyan «zimaní rojhane» u yekíshíyan «zimaní remekí»11. Zimaní remekí le farsída (zeban ‘amíyane)í pé dellén u le ínglísída (slang)í pé dellén. Zimaní remekí zimaní ew xellkeye ke bebé sillemínewe u azadanetir u dúr le hendék sinúrdananí resmí be yekewe deduwén u le qise kirdiníyanda peyví ewto bekar dehénin ke lewaneye le bone resmíyekanda tewaw xoyaní lé biparézin, kabiray fars dellé: «biru gum shu be weqtish hisabit ru mírisem». Wergérdirawí Kurdíy em ristane her lem aste remekíyeda debéte shitékí nizík leme: «birro de xot hellde, wextí xoy mishúrt dexom». Em derbirrínane le astí zimaní remekí (zeban ‘amíyane ـ slang) dan. Bellam zimaní rojhane yan zimaní qise kirdiní rojhane zor le zimaní núsín dúr nakewétewe. Legell zimaní núsín jíyawazíyekey lewe daye nexték narresmítir u herweha súkellekirawe. Bo nimúne fars dellé: «kitabish ru xundem» eger her em risteye le zimaní standardí núsínda be kar bihéné denúsé: «kitabish ra xandem».

   Hemú ew derbirrínaney xwarewe ke le ferhengí zarekíy mukiríyan hellbijhérdirawin nimúney derbirríní remekín: emin dellém nére ew dellé bídoshe, espé de gírifanída sewzelley dellé, esp be kurtaní keré razí nabé, Kirmanj wek kermíz waye rú le her kuwé ka awedaní deka, ew babet mird. Em derbirrínaney xwarewesh nimúney derbirríní rojhanen. Le mukiríyan dellén: hato yan hatotewe. Le erdellan bo nimúne dellén eyhénéto. Bekarhénaní em wushane her bem shéweye le zimaní standardí núsínda helleye u zebir le standardibúní ziman deweshéné. Le zimaní standardida denúsín «hatúwe»؛ (hato shéwey súkellekirawí «hatúwe»íye), «hatúwetewe» (hatotewe shéwey súkellekirawí «hatúwetewe»íye), «deyhénétewe» (eyhénéto, shéwey súkellekirawí «deyhénétewe»íye).

   Ésta ke zaníman ci sinúr u serawirdék le néwan zimaní zarekí u zimaní standardida heye. Ewjar norey eweye awirr le bayex u giríngíy zimaní zarekí bo zimaní núsín bideynewe. Gutiman zimaní zarekí be birruway hendék zimannas dú beshí heye, yekíyan zimaní qisekirdiní rojhane u yekíshíyan zimaní remekí؛ (duwatir níshan dedeyn ke zimaní zarekí beshékí zor benirxí tiríshí heye). Ésta delléyín zarawey zimaní núsínísh her barteqay zimaní standard bertesk nabétewe. Zimaní núsín le bekarhénaní resmída debé standard bé. Wek ew zimaney le kitébe dersíyekanda kelkí lé werdegíré. Bellam zimaní núsín bo nimúne le biwarí edebí dastanída péwístíyekí yekjar zorí be zimaní zarekí ـ be hemú beshekaníyewe ـ heye. Le xorra níye hem le «ferhengí zarekí mukiríyan»da u hem le «destebuxce»da ke qerare peyve kokirawekaníyan le zimaní xellk xwastirabétewe, be léshaw kelk lew zarawe u pend u meselane wergírawe ke le romanekaní kak fetah emírí (hawarebere u mírza)hellـénjrawin. (her lérewe lewaneye ew súkerrexine meylew péshiníyare berew rúy kak Selah bibétewe ke madam ew dú romaney kak Fetah sercawey hénde be kelk bún bo ferhenge zarekíyekey, edí bocí kelkí le romaní zíndexew werinegirtúwe? yan wekú nimúneyekí tir eger kelkí le berhemékí kembarrstayí wergérrék wergirtúwe (romaní gélellíyaw) bocí kelkí le berheme pirrbarrstayí u qebetirekaní her ew wergérre, wek «hemedok u dan cermú» werinegirtúwe? Éstash necúwe bicé, ba bo amade kirdiní bergekaní díke ew berhemanesh bixréne rízí sercawekan). 

   Wate delléyín beshék le zimaní zarekí (ew beshey péyí delléyín zimaní remekí) kelkí yekjar zorí bo beshék le zimaní núsín (ew beshey péyí delléyín zimaní núsíní xeyre standard ke bo nimúne le edebida kelkí lé werdegíré) heye. Bellam deretane lebinnehatúwekaní zimaní zarekí bo zimaní núsín barteqay héndey basman kird bertesk nabétewe. Zimaní zarekí béjge le dú beshí zimaní qise kirdiní rojhane u zimaní remekí beshékí zor heraw u giríngí díkeshí heye. Ew beshe wek con le zimaní zarekída kelkí lé werdegíré, her awa dekiré le zimaní standaríshda be shéweyekí berifrawan kelkí lé werbigíré؛ éstash basí cend nimúneyek dekeyn. Le Kurdída zorjar bebé girift «yay nísbet» be duway nawewe denúséndiré, bo nimúne Mehabad debéte Mehabadí. Bellam hendék wushe hen xoyan duwayín típíyan «í»íye, wek «Silémaní» u «jelí». ínja con detwanín yay nísbet bem ushanewe zíyad bikeyn? cunke dú «í» be duway yekda béjh nakirén. Hestékí un xtúkeman deda billéyín le néw súcékí pishtguwéxirawí zimaní zarekíy xellkda ‘ílajékí ew girifte kirawe. Her awashe mamosta Mes’úd Mihemmed bo careserí em girifte pena debate ber zimaní zarekí u dellé: «le gutarékémda núsíbúm «í»í nísbet lew wushaneda ke kotayían be «í» dét, le dewruberí Soran be hénaní «t» bo néwan «í»í kotayí wushe u «í»í nísbet, em deqe nísbete deparrézin u dellén kabiray jelíyetí, smaqúlíyetí ke nísbete bo jelí u smaqúlí. Duway núsíní gutareke u billaw búnewey le govarí korrí zaníyarí Kurdida be mawey sallék yan ptir kaxezim le xuwéndikarékí xellkí Silémaní ke le Mosko deyxuwénd wergirt. Téyída núsíbúy ke xoy le cend genjékí xuwéndikarí koyí pirsíbúy aya «jelíyetí, Silémaníyetí . . .» bekar dé le koyé? gutibúyan hergíz shití wehaman nebístúwe. Béguman ewan rastíyan kirdúwe, cunke be zehmet degene ladéyíyek ke jaré deqí Kurdí resení lebír mawe heta léyí bibíyen. Silémanetí . . .»12 

   Ke wate beshék lew résa zimaníyane ke le néw zimaní zarekída hen, bellam héshta nedozrawinetewe u be shéwey zanstí shítell nekirawin, giríngayetíyekí zoríyan bo zimaní standard heye. Bo zimanék wekú zimaní Kurdí ke núsíní réziman be shéweyekí hemelayene u zanstí u térutesel nekirawe. Ew giríngíye héndey díkesh tox debétewe. Jige lem résa keshfnekirawane, zorbey ew zarawe u derbirríne zaraweyíyaney (idioms and idiomatic expiressions) le zimaní zarekída hen. Her bem shéweyesh dekiré le néw zimaní standardida kelkíyan lé werbigíré. Ke wate ésta delléyín zimaní zarekí lexogirí sé jhérkomaye: 1 ـ zimaní rojhane 2 ـ zimaní remekí 3 ـ beshékí hawbesh legell zimaní standard ke yan ta ésta le zimaní standardida dekar kirawe yan egerísh dekar nekirawe boy heye be shéweyekí sístimaték dekar bikré. Dísan wekú nimúne dellém way dabinéyín xeríkín deqék le zimaní Farsírra werdegérrínewe ser zimaní Kurdí, túshí ew cend risteyey xuwarewe hatúyn:

   • Badinjan bem/ bed afet nedared. 
   • Filaní xurde shíshe dard. 
   • Der heft asiman yik stare nedarem. 
   • Buruw ser u gushí ab bidih u zúd bergerd.

   Em ristane con wergérríne ser zimaní Kurdí? Beshí séhemí zimaní zarekí léreda zor be hasaní defiryaman dé. Wergérrdirawí hemú ew ristaneman le ferhenge zarekíyekey kak Selah payaníyanída dozíwetewe:

   • Badinjan bem/bed afet nedard: espéyí genimí weber naye. 
   • Flaní xurde shíshe dard: flan kes esponekey wurde. (lékdanewey kak Selah bo em derbirríne awaye: wate «’eybí dekarída heye. espon eger wurd bú, le tirsí ewey geplley degell lék dirabé, be napesendí dezanin».) 
   • Der heft asman yik sitare nedarem: le hewt ashan denke joyek shik nabem. 
   • Buruw ser u gushí ab bideh u zúd birgird: bicú derawan be taqí kewe u xéra bigerréwe.

   Eger le bírtan bé le beshékí em witareda gutiman girifték bo ewey ferhengékí le ceshiní em ferhengey kak Selah be «ferhengí zarekí» nawdér bikeyn emeye ke le néw em jore ferhenganeda zarawe u rékewendí ewto hen ke bo bekar hénaníyan le néw zimaní nivísaríshda híc lemperék níye. Ésta dezanín her ew beshey séhemí zimaní zarekíye ke dekiré le zimaní núsíníshda kelkí lé werbigíré. Bellam le binerretda zimaní núsín ya zimaní standard em beshey le zimaní zarekí xuwastotewe. Ke wate ésta detwanín be xatirjemíyewe billéyín em ferhengey kak Selah ser be suninetékí ferhengnúsíy Kurdí ye ke dekiré be nerítí ferhengnúsíy zarekí nawdérí bikeyn u eger le heqísh lanedeyn le néw em ferhenganey lem sunineteda núsirawin ferhengí zarekíy Mukiríyan shan u qellafetekey hénd berze ke ferhengekaní díke desharétewe. 

   Demanewé be guwérey ew sé taybetimendíyaney le seretay em witareda basman kirdin (gishtgir bún, jégay mtimane búní lékdanewekan u zanstíy búní métodí núsíní ferheng), hellsengandinékman le ser ferhengí zarekí mukiríyan hebé. 

   Bo selmandiní gishtgir búní em ferhenge tegereyekí ewtoman nayéte ser ré. Ew bergey bo herfí «ـ» terxan kirawe be teníya 550 laperre ye u bergí duwayésh ke her be teníya bo herfí «b» terxan kirawe 590 laperre ye. Dekiré pena bibeyn bo nimúneyekí berhesttirí díke. 

   Medxelí aw, medxelí jhimare 764e. Hetakú jhimarey 1424 wate rék 660 medxelí péwendídar be wushey aw lem ferhengeda hatún. Ítir le naw u awellnaw u cawgewe bigre heta dabunerít u da u derman u pend u mesell u metell u kaye u Goraní u firr u jinéw u suwénd u du’a. Ewey péwendí be wushey awewe hebé, em ferhenge girtú ye. Em taybetimendíye súkehellwésteyekiman pé deka heta be térrwanínékí tir bo ferhengí zarekíy Mukiríyan birrwanín. Katék debínín kem babet heye ke bo nimúne péwendí be díyardey aw le komellgay nerítíy Kurdewaríyewe hebúbé u em ferhenge neygirtibé, bem enjame degeyn em ferhenge her be teníya be karí lékollínewey zimaní naye. Bo nimúne xuwéndikarékí komellnasísh ke dexuwazé leser komellgay Kurdí u ferhengí nerítíy Kurdí lékollínewe bika zehmete bitwané sercaweyekí girdukotir u rékupékitr lem ferhenge bidozétewe. «ferhengí zarekí Mukiríyan» le rastída dayretulme’arífékí ferhengí nerítíy Kurdí ye. Eger lew jíyawazíyey duktor Ewrrehmaní Hají Marif basí deka wurd bínewe em mebesteman zor cakitr bo rún debétewe. Duktor dellé: «her cend ferheng jorí zore, bellam legell eweshda detwanré dú jorí serekí jíya bikrétewe: 1 ـ ferhengí ínskilopédí [ewey le éran péyí delléyín dayretulme’aríf], 2 ـ ferhengí fílolojhí. Ferhengí ínskilopédí sebaret be rúdaw u díyarde u xellk . . . Htd deduwé. Hercí ferhengí fílolojhíye le wushe dekollétewe. Wate wushe ke daney zimane keresey serekíy ferhengí fílolojhíye».13 

   Ke wate ferhengekey kak Selah le rastída ferhengí ínskilopédíye u ferhengí fílolojhí níye. Ínja déyíne ser basí jégay mtimane búní lékdanewekan. Seruber kirdiní karékí lem ceshine wate núsíní ferhengékí zarekíy bawerrpékiraw, her be teníya be gerranewe bo sercawe resen u destlénedirawekaní zimaní axaftiní xellkí Kurd meyser debé. Serleberí em ferhenge líllpawlíp le níshaney ewton ke péman deselménin kak Selah lem gerranewe bo sercaweye cakí bo de binawan kirawetewe. Díyare núser ber lem pirrojhe gewreyesh ezimúnékí le ceshiní «kaní miradan» hebúwe. Bo níshandaní rijhd búní ew hewraze u pishúbirr búní zebirí awzengí ke swar bo serkewtin lem hellemúte hezar be hezare debé dekarí bika lewaneye her hénde bes bé ke billéyín lem meydaneda Kurdízaní le zebirí wek mamosta Héminísh wa hebúwe biglé. Kak Selah xoy lew péshekíyey bo bergí yekemí kitébekey núsíwe amajhe bem shé’rey mamosta deka:

   Héshta dúr nebúm le hellgurd kíjhim dehatin le she u gurd

   Lew ferhengokey duktor Ewrrehmaní Hají Marif bo «tarík u rún»í kirdúwe, le beranber wushey «she u gurd»da núsirawe «jhuwaní shewane» le medxelí jhimare 1983í bergí yekem le lékdanewey zarawey «delléy bení estúrí, qet de she u gurdí kes nayey» awa hatúwe:

   «she: shé, shane, dane daney tan u rayellí bení jajm ya popeshmín ya berrmall ya búzú, be kelén denkekaní ew sheyeda rayell dekirén. Gurd: dú jút cuwarcéwey darínin ke le panayíyewe ríze benék wekí denke shane be yek mewda qaym kirawe u dekewéte pishtí shé. [manay em zaraweye debéte ewe:] be karí kes nayyey, de xem u xoshíy kesda ní. [shayed le beytí ehmedí sheng:] bíst u pénj kes hemú serdar’él, hemú píyawí wécú, ídí her zemaney kesék de she u gurdí diníyaye dekishé…»14.

   Raste ferhengokí tarík u rún mamosta Hémin neynúsíwe, bellam be seréní xoy núsirawe u agay lé hebúwe. Le zor lékdanewey ferhengí zarekíy Mukiríyan da, núser helley ferhengekaní pésh xoy rast kirdotewe; bo nimúne kak Je’fer hosínpúr (hédí) le kitébí destebuxce le beranber zarawey «delléyí awí danúant be xoda kirdúwe»15da núsíwíe: [wate] zor bétamí; awí danúan bétam u bé xiwéye;؛ boye wa dellén. Kak Selah le beranber medxelí awí danún be xoda kirdin, em helleyey destebuxcey awa rast kirdotewe: [wate] tembellí u kar nekirdin. [nimúne] «dest le resh u spí nada u be jarékí awí danúaní be xoda kirdúwe»16. Ber lem zaraweyesh núser zor bewurdí le ser rékewendí awí danú u dabí péwendídar bem díyardewe le mukiríyan, duwawe. Le barey layení zanistíy ferhengí ber bas péwíste amajhe bem xallaney xuwarewe bikeyn:

   Yekem. Núserí ferhengí zarekíy Mukiríyan le bergí yekemda béjge le medxele serekíyekan medxele fer’íyekaní le shazde beshda lék juda kirdúnewe; em beshane birítín le: bawerr, pend, jinéw, dab, da u derman, du’a, rékewendekan, rékewendekaní risteyí u amall risteyí, zarawe, ziman xelleténe, suwénd, firr, kaye u Goraní, lékdanewey xewin, metell u mesel. Le bergí dúwem, dú beshí díke wate néw u nirtke u heqayetísh bem beshanewe zíyad kirawin. Em lék juda kirdineweye símayekí zor rék u pék u tekúz u zanistí dawe be ferhengí zarekíy Mukiríyan.

   Yekem jar núserí destebuxce, hem le péshekíy kitébekey u hem le witarékda be nawí «snúrék le néwan pend u zarawe»da le govarí sirwe le ser péwístíy lék juda kirdinewey jorekaní derbirrín le zimaní axaftinda babetí núsí. Kak Je’fer husénpúr (hédí) le barey jíyawazíy néwan pendí péshíníyan u zarawe u mesel denúsé: «pendí péshíníyan shéweyek qisey be (idiom) wek le néwekeyirra díyare pendékí tédaye, bellam zarawe (Proverb) tuwékille u manayekí téda shardirawetewe nek pendék. Bo nimúne «bazarí kesade», «ba ew suwéndem lé bikewé», «ba nosh béte ser dey» […] hemúyan zarawen, kecí [le sirweda] le jhír nawí pendí péshíníyanda billaw kirawinewe; bellam «destit be kewgír bé, cawt le feqír bé», «píyawí destewestan, ci le germén, ci le kuwéstan» pendin nek zarawe. Meselísh qiseyekí nesteqe ke be dastanék yan rúdawékewe debestirétewe, wek: dimdimí bo billéyí kullí giríyaní helldesté»17. Egercí lék juda kirdinewey em shéwe derbirrínane hendék jar berrastí dijhware u tenanet kak Je’fer boxoshí wa hebúwe bo nimúne Goraní daykan bo korre sawakaníyaní be nawí zarawe billaw kirdotewe (hey kurre nan u hey kurre do, berxel berbú bere jo. Destebuxce, lap. 228), bellam begishtí em shéwe lék juda kirdineweye bú be rénuwénékí bash bo towéjheraní duwatir. Péshtir basí eweman kird ke hénaní hejhde jor derbirrín ya dabunerítí péwendídar be babetékewe, ferhengí zarekíy mukiríyaní kirdúwe be dayretulme’arífékí kem wéne. Lem rúwewe ferhengí zarekíy Mukiríyan ta ésta taqaneye. 

   Dúhem. Núserí ferhengí zarekíy Mukiríyan, bo rízbendíy medxel u jhérmedxelekan le niwétirín métodí zanistí ke be «rízbendíy héshúyí» denasiré, kellkí wergirtúwe. Lem métodeda medxele serekíyekan le rúy elfubéwewe be duway yekda réz kirawin, bellam medxele fer’íyekaní péwendídar be medxele serekíyeke be shéwe héshúyí u wekú endamaní xézanék le jhér cetirí medxele serekíyekeda ko búnetewe. Seretí u qaní bercawí recaw kirdiní em métode eweye ke wa deka derbirríne péwendídarekan, hemú be yekewe le jhér cetirí medxelékí serekída kobibnewe. Eger wa nebuwaye, derbirríne be yekewe xizmekan wekú towí herzin le hemú kitébekeda billaw debúnewe u péwendíy organíkíyan lék depicrra. Le ferheng núsíy Farsída, bo nimúne le berhemí benirxí «ferheng Farsí ‘amíyane»í núsirawí mamosta Ebulhesení Nejefí, kellk lem métode wergírawe. Díyare kak Selah sererray kellk wergirtin lem métode zanistíye le pashkoy ferhengekeyda le beshí cawsaxí elfubéyída bo rénuwéníy xiwéner kelkí le shéwey elfubéyísh wergirtúwe ke zor cak bo dozínewey medxelekan destí xiwéner degirré.

   Séyíem. Núserí ferhengí zarekíy Mukiríyan be pécewaney ferhengekaní péshú, derbirrínekaní be shéwey mesderí núsíwin. Le zanistí ferhengnúsíy modérrinda zarawekan be shéwey gerdankiraw u bo biker yan jénawékí taybet nanúsirén u em kare be karékí nazanistí hísab dekirré. Bellam bo nimúne mesel nabé be shéwey mesderí binúsiré. Kak Selah bo núsíní derbirrínekan be shéwey dirustí xoyan, amanjekey be cakí engawtúwe u bebé zéderroyí debé billéyín ke cak be ser karekeyda zall búwe u be taqí tené karékí kirdúwe ke le willataní díke rékxirawék deyka. Híwadarim cawiman be dítiní berge yek le duway yekekaní ferhengí zarekíy Mukiríyan rún bétewe.

   Sercawe u perawézekan:

   1. Hejhar, henbane boréne, bergí yekem, capí yekem, Sirúsh, 1368, lap 7
   2. sercawey péshú, lap 6
   3. Ebidurrehmaní zebíhí, qamúsí zibaní Kurdí, íntsharatí Selahedín Eyíúbí,1367,lap 26 
   4. sercawey péshú, lap 27
   5. Dr. Ewrrehmaní Hají Marif, ferhengnúsí, le péshekí sercawey jhimare 3
   6. Taha Feyzízade, ferhengí wushe dúanekaní zimaní Kurdí, íntsharatí Selahedín Eyíúbí, 1367
   7. Síd ‘Bidalhmíd Hírt Sjadí, pind píshíníyan, jild ewel, Intisharat Selahaldínay Eubí, 1369
   8. Qadir Fetahí Qazí, Emsal u Hukem Kurdí
   9. Je’fer Husénpúr (Hédí), destebuxce, zarawey jhnaní Mukiríyan, Swéd, kitébí Herzan, 1999
   10. sercawey jhimare 1, li 186
   11. em polén kirdine. Hí mamosta Ebulhesení Nejefí ye, birrwane: beha Eldín Xuremshahí, noqte ‘etf u tehewul jherf der ferhengi nigarí Farsí
   12. Mes’úd Mihemmed, kurteyekí bírurra le ser péshgirekaní lé, té, pé, sirwe, jhimare 73, li 18
   13. sercawey jhimare 5, li 72
   14. Selah Payaníyaní, ferhengí zarekí Mukiríyan, bergí yekem, dezigay cap u billaw kirdinewey rehrrew , 1385, 3865
   15. sercawey jhimare 9, li 121
   16. sercawey jhimare 14, li 265
   17. sercawey jhimare 9, li 11

   ————————————–

   Sercawey babet: Mehabad, jhimare 100

   Em wutare le layen KAL:ewe le rénúsí Kurdí-Erebí hénirawete ser rénúsí Kurdí Yekgirtú,